Jesús - Mixe, Tlahuitoltepec

JA ØGYAJPXY JA ØMYADYA̱'A̱KY
MIDI JA MARCOS YJA̱A̱Y

1.1
Ku Juan Bautista kya'ama̱a̱y aba̱k etjotp

1.1 Yɨde'en yiknɨmadya̱k'okwa̱a̱ñ ja øgyajpxy ja ømyadya̱'a̱ky midi ja nwɨndsøn'a̱jtɨm Jesucristo yja'ajtpy, ja Dios U'nk.

1.14-15
Ku ja Jesús tpadøjkɨyɨɨ'ñ ja tyunk

1.14 Jøts ku ja Juan wyɨnaty tø yikpɨkta̱knɨ jap puxøjkjøtpy, wɨnets ja Jesús chøø'ñ jøts ja ñijkxy Galile'ɨt etjotp, ma̱ ja tnɨga'ama̱a̱y ja øgyajpxy ja ømyadya̱'a̱ky, midi ñɨgajpxpy sa̱ Dios ja yja̱a̱'y ttanɨtanɨt ja kyutujk.
1.15 Yɨde'en ja wya̱a̱ñ:
―Tønɨm ɨnet ja xøøw ja et yja̱'a̱ty, wɨngomp ɨxya̱m ja Dios kyutujk midi ya̱ tu'ump. Yiktɨga̱tstɨ ja mdsɨna̱a̱'yɨndɨ, ja̱'dyɨgøøgyøxtɨ tukɨ'ɨyɨ ja mga'øyja̱a̱'y'a̱jtɨndɨ, jøts janchja̱wɨdɨ ja øgyajpxy ja ømyadya̱'a̱ky.

1.21-27
Tu'uk ja ya̱a̱'dyøjk pøn ja mɨku'
wyɨnaty tø tyatøkɨyɨ

1.21 Xjats ja ojts yja̱'a̱ttɨ Capernaum, jam møj ka̱jpkøjxp; jøts ku poo'kxɨn xøøw tpa̱a̱jty, wɨnet ja Jesús ñijkxy yik'ɨxpøjkpɨ jam israelɨt ja̱a̱'y cha̱ptøjkjotp.
1.22 Xjats ja ja̱a̱'y ja jam ñɨgyuma̱a̱p tja̱wɨdɨ, ku Jesús ja jade'en yik'ɨxpikyɨdɨ sa̱m ja ja̱a̱'y pøn ja møk kutujk tmøøt'a̱jtp, ka'ap ja jade'en yik'ɨxpikyɨdɨ sa̱m ja ka̱jpxwejpɨtøjk pøn yik'ɨxpøjktɨp jap israelɨt ja̱a̱'y cha̱ptøjkjøtpy.
1.23 Japts wyɨnaty tu'uk ja ja̱a̱'y tsa̱ptøjkjøtpy pøn wyɨnaty ja mɨku' tø tyatøkɨyɨ, ja' møk yɨde'en wa̱a̱n:

1.24 ―¿Mets Jesús, Nazaretɨt ja̱a̱'y, tiku øø tø xnɨmiñ, sa̱ øø xunwa̱'a̱ñ? ¿Ja' mets tø xnɨmiñ jøts øø xyikudɨgøøgyøxt? Wa̱'a̱ts me n'ejxkapy pønɨ pøn mets. Ka'axɨ me mbøkmyøødɨ, Dios ja̱a̱'yxɨ mets.

1.25 Xjats ja Jesús møk twɨnguga̱jpxɨyɨɨ'ñ ja mɨku', jøts ja tnɨma̱a̱y:
―¡Amøñɨ, kidi nugo mgajpxy, tsojk majtstu'ut yø ja̱a̱'y!

1.26 Xjats ja mɨku' møk'ampy tyikmɨbejpɨjky ja ja̱a̱'y, jøts ja møk chaba̱a̱y, wɨnets ja pyɨdsɨɨmy.
1.27 Xjats ja mayja̱a̱'y janchnɨgyuma̱a̱p tja̱'wɨdøø, jøts ja xem ya̱m ñadyɨɨbyikyɨdɨ kø'øm, yɨde'en ja ñawya̱'a̱ñɨdɨ:
―¿Ti wenk ɨxpøjkɨn ya̱'a̱t? ¿Ti tunk yø jade'en tyumpy? ¡Janch møk kutujk tmøødɨ, mɨmadojɨp pa̱a̱t ja mɨku' yø' ku yø t'ane'emy!

1.32-34
Ku ja Jesús tyikmøkpɨjky ja maabyama̱a̱'y

1.32 Waanɨ y'ijty ku ja xøøw yjejxy jøts ku kyoodsɨña̱a̱, wɨnet ja Jesús yiktanɨmiiñ ja mayja̱a̱'y pøn wyɨnaty pøjkɨdɨp, jøts ja ja̱a̱'y pøn wyɨnaty tmøøt'a̱jttɨp ja mɨku';
1.33 nɨdukɨ'ɨyɨ ja ka̱jp ja̱a̱'y myendøø tøk'agø'øm ma̱ ja Jesús jam wyɨnaty.
1.34 Xjats ja may tyiktsøøjky ja pama̱a̱'y pøn wyɨnaty tigati pøjkɨdɨp, ojts ja tyiktsokixy jøts ja mɨku' ja tyikpɨdsømgɨjxy midi ja ja̱a̱'y wyɨnaty myøøt'a̱jttɨp; jøts ka'ap ja mɨku' ja tyikajpxy, kumɨ ñɨja̱'wɨp ja' paty ja jade'en ttuñ jøts ja kyadamɨga̱jpxɨyɨt jøts ku ja Dios U'ngɨ.

2.1-12
Ku ja Jesús tyikpɨdɨ'jky ja køxujxpɨ pakxujxpɨ

2.1 Ku wyɨnaty kawɨna̱a̱k xøøw tø ña̱jxnɨ, xjats Jesús jadɨgojk kya̱jptøjkɨyɨɨ'ñ jam Capernaum; jøts ja̱a̱'y ja tnɨja̱'wɨdøø ku ja wyɨnaty tø yja̱'a̱ty jam tøjkjotp.
2.2 Xjats ja mayja̱a̱'y jatyɨ ñamyujkɨdøø, yikxon ja tøjk yjanch'ujch, ka'ap ja y'uknɨba̱a̱jtɨnɨ; jøts ja Jesús jam tnɨga'amay ja øgyajpxy ja ømyadya̱'a̱ky.
2.3 Wɨnets ja ja̱a̱'y yja̱'ttøø nɨmakta̱xk pøn tkɨyja̱'ttøø tu'uk ja pama̱a̱'y pøn wyɨnaty køxujxp pakxujxp.
2.4 Xjats ja Jesús ja tjpa̱a̱twa̱'a̱ndɨ, jøts kumɨ nɨma̱ kya'awa̱'a̱dsɨ kumɨ tø ja mayja̱a̱'y wyɨnaty t'awa̱'kta̱'tsnɨdɨ ja tøjk'a̱a̱w, wɨnets ja tnɨta̱jtuttøø ja tøjk jøts jut ja tyik'awa̱tstøø. Japts pama̱a̱'y ja tyikwɨna̱jktøø møøt ja mya̱a̱bajt jap Jesús wyɨndujpy.
2.5 Xjats ku ja Jesús ojts t'ixy ja ja̱a̱'y pøn tyikmendøø ja pama̱a̱'y jøts ku ja amuum yjanchja̱wɨyɨ, wɨnets ja pama̱a̱'y ja tnɨma̱a̱y:
―Nbojkpɨmee'kxpy mets u'nk.

2.6 Jamts wyɨnaty ja ka̱jpxwejpɨtøjk chøønɨdɨ pøn wyɨnaty ttuk'ɨxpøjktɨp ja Moisés kyutujk jam tsa̱ptøjkjotp, ja'ats yɨde'en wɨnmaadyøø:
2.7 “¿Ti yø ja̱a̱'y jade'en kyuwa̱'a̱nɨp, sa̱ yjaty? ¿Tiku yø jade'en wya̱'a̱ñ? ¡Ka'ap ɨdø'øn jade'en y'øyɨ! ¿Pøn ja pøky ya̱ t'ukmaa'kxp, kidi Diosɨp tu'ugyɨ tmaa'kxp ja pøky?”
2.8 Xjats ja Jesús ñɨja̱'wɨp ja wa̱'a̱ts ku ja ja̱a̱'y jade'en wyɨnaty wyɨnmaydɨ, wɨnets ja tnɨma̱a̱y:
―¿Tiku jade'en nɨchøky mwɨnmaydɨ?
2.9 ¿Ja ti ne'egɨ jawaanɨ ja̱jtnɨ, kuts yø pa̱'a̱mja̱a̱'y nnøjmɨt: “Mee'kxpy øts yø mbøky”, uk ku nnøjmɨt: “Wa̱'kukɨ, pøkmuknɨ yø mma̱a̱bajt jøts nøjkxnɨ mdɨga̱m”?
2.10 Ɨxya̱mnɨm meets ɨnet x'uk'ext ma̱ba̱a̱t øts ɨdø'øn ja møk'a̱jtɨn nmøøt'aty ya̱ na̱xwiiñ jøts ø nmaa'kxt ja pøky.
Xjats ja tnɨma̱a̱y ja køxujxpɨ pakxujxpɨ:

2.11 ―Pɨdøknɨ, wa̱'kukɨñɨ, wejtsjø'øk yø mma̱a̱bajt jøts mnøjkxnɨt mdɨga̱m.

2.12 Xjats ja pama̱a̱'y jatyɨ pyɨdɨ'jky; ojts ja mya̱a̱bajt ja twejtsjɨ'ɨky, jøts ja jam cho'onɨ mayja̱a̱'yjotp. Paty ja ja̱a̱'y nɨdukɨ'ɨyɨ ñɨgyuma̱a̱p tja̱'wɨdøø ku ja pama̱a̱'y jade'en myøkpɨjky, xjats ja Dios ja ttamøja̱'wɨdøø, jøts ja wya̱ndøø:
―Nɨma̱ nɨwɨndinɨm jade'en nga'ijxyɨndɨ.

4.35-41
Ku ja Jesús tyikna̱jxy ja møk poj, jøts ku ja
tyik'amøkɨyɨɨ'ñ ja mejy

4.35 Xjats ku kyoodsɨyɨɨ'ñ ja et nay ja'abɨ xøøw, wɨnets ja tnɨma̱a̱y pyabøjkpɨtøjk:
―¡Wan tja̱a̱'myɨndɨ jaduktama̱jñ'ampy jam nøøba'a̱m!

4.36 Xjats ja jade'en tmɨnawya̱'kxɨdøø ja mayja̱a̱'y, jøts ja jap ba̱rkɨjøtpy tyiktsoo'ndøø ja Jesús ma̱yɨm ja jap wyɨnaty, ojts abikbya̱rkɨ ja pyadsøøñɨdɨ, ja' ja ojts tmøøtnøjkxtɨ.
4.37 Xjats ja poj jam janch møk myiiñ, jøts ja nøø møk'ampy y'adøtspɨna̱xwa̱'jky, yikxon ja yjanchtojmjɨ'jky jøts ja kom nøø tyøjkɨyɨɨ'ñ jam ba̱rkɨjotp, ujtsnɨp ja wyɨnaty.
4.38 Jamts ja Jesús wyɨnaty mya̱'a̱y ba̱rkɨ ɨx'a̱m, tø ja jam wyɨnaty ñagyukøyɨyɨ; wɨnets pyabøjkpɨtøjk ja ojts yuxyɨ, jøts ja ojts ñɨɨ'mxyɨ:
―¡Wɨndsøn! ¿Kidi mdsø'øgɨ ku nnøjøø'kxɨn uk ku n'oo'kɨn?

4.39 Xjats ja Jesús pyɨdɨ'jky jøts ja møk twɨnguga̱jpxɨyɨɨ'ñ ja poj; jøts yɨde'en ja mejy tnɨma̱a̱y:
―¡Mɨmadook øts et, kidi m'adɨ'ɨch!
Wɨnets ja mejy jatyɨ y'amøkɨyɨɨ'ñ jøts ja tu'ugyɨ tya̱a̱ñ.

4.40 Xjats ja tnɨma̱a̱y pyabøjkpɨtøjk:
―¿Jadits ku mdsø'øgɨdɨ, tigøjxp ku ø xkajanchja̱wɨdɨ?

4.41 Wɨnets ja yjanchø'jkɨdøø, yɨde'en ja kø'øm ñawya̱jnɨdøø:
―¡Pønɨmts ɨdø'øn ya̱'a̱t ndejɨnt, sudso poj sudso mejy yø myɨmadøyɨ!

5.22-24
5.22 Tø dø'øn ja jam wyɨnaty tyañ ku ja̱a̱'y jam tu'uk yja̱'jty midi yik'ɨxpøjkp jam tsa̱ptøjkjotp. Jairo, ja' ja xyøøw'ajtpy. Xjats ku ja t'ejxpa̱a̱jty ja Jesús, wɨnets ja ñagyuxendya̱a̱jkøø jam Jesús wyɨndum
5.23 jøts ja tjanchmɨnuu'kxa̱a̱jky, yɨde'en ja tnɨma̱a̱y:
―Jotkøjxnɨp øts n'u'nk xjap; men mgø' xanɨxa̱jy, jøts myøkpøkt jøts yjujky'a̱tt.

5.24 Xjats ja Jesús ojts tpanijkxy ja ja̱a̱'y; namay ja ñøjkxtɨ, may ja̱a̱'y ja janchpadsoo'nøø, yikxon ja yjanchyik'atejmujky.

5.35-42
5.35 Ɨxamnɨm ja Jesús jade'en wyɨnaty wya̱'a̱ñ, ku ja̱a̱'y jam yja̱'ttøø midi wyɨnaty tso'ondɨp jam møja̱a̱'y tyøjkwɨndum, ja møja̱a̱'y midi wyɨnaty tump jam tsa̱ptøjkjotp, xjats ja yiknɨma̱a̱y:
―Tø ja mnøøx y'oo'knɨ. ¿Tiku yø wɨndsøn nugo xyikjotkøjx'adɨ'ɨch?

5.36 Myadøøpy ɨdø'øn Jesús ja' ku ja møja̱a̱'y jade'en yiknøjmɨ, xjats ja tnɨma̱a̱y:
―Kidi mdsø'øgɨ; ja'ayɨ amumjoojt xjanchja̱wɨt.

5.37 Jøts ja ojts ñøjkxtɨ, ka'ap ja Jesús tkupɨjky ja mayja̱a̱'y jøts ja myøøtwɨdetɨyɨt, Pedro ja nugo myøøt'a̱jt, møøt ja Jacobo, jøts ja Juan midi ja Jacobo y'uch'ajtpy.
5.38 Xjats ku ja jam yja̱'ttøø ma̱ ja ja̱a̱'y jam wyɨnaty chøønɨ pøn tump tsa̱ptøjkjotp, wɨnets ja ojts t'ixy jøts ku ja ja̱a̱'y nugo xem ya̱m y'adøtsnɨdɨ, pømbɨ jap waanɨ ya̱xp, jøts pømbɨ jap janch møk ya̱xp.
5.39 Xjats ja Jesús tyøjkɨyɨɨ'ñ jap tøjkjøtpy, jøts ja tnɨma̱a̱y ja ja̱a̱'y:
―¿Tiku jadɨne'en mna'amdɨ, jadits ku mya̱'a̱xtɨ? Ka'ap yø kiixyu'nk y'øøky, ma̱a̱p yø'.

5.40 Wɨnets ja ja̱a̱'y ja ojts tnɨxe'ektɨ. Xjats ja Jesús t'ɨxkajxpɨdsømgɨjxy ja ja̱a̱'y, nugo u'nkteety u'nkta̱a̱k ja ojts tmøødɨ jøts ja pabøjkpɨtøjk midi ja jam wyɨnaty myøøt'ajtpy, xjats ja tyøjkɨyɨɨ'ñ ma̱ ja kiixyu'nk jap wyɨnaty,
5.41 jøts ja ojts tnɨxa̱jɨ kyø'køjxp, yɨde'en ja tnɨma̱a̱y:
―Talita, cumi ―yɨde'en ɨdø'øn ja tijy: Mets u'nk ɨdø'øn nnɨmaapy, pɨdø'øk.

5.42 Xjats ja kiixyu'nk jatyɨ tyanaagyukɨyɨɨ'ñ jøts ja yø'øbyɨjky jadɨgojk, makmajtsk ja yjumøjt ja wyɨnaty. Wɨnets ja ja̱a̱'y yjanchø'jkɨtyɨgøødyøø ku ja jade'en t'ejxtøø.

7.18-23
7.18 Xjats ja tnɨma̱a̱y:
―¿Nɨ meets pa̱a̱t yø xkanɨmadoonɨ? ¿Ka'ap xnɨja̱wɨdɨ ku ja̱a̱'y nɨti jɨɨ'kxy kyayikpøkpyetyɨ ku ja̱a̱'y ti tjɨɨ'kxy?
7.19 Ka'ap jɨɨ'kxy tyøkɨ anmɨja̱'wɨnjotp, maatsjotp ja jɨɨ'kxy tyøkɨ ma̱ ja tɨnch, jøts pyɨdsimy ku ja̱a̱'y ñijkxy nawyɨyø'øyɨbɨ.
Jade'en ɨdø'øn ja ojts tnɨgajpxy jøts ku jɨɨ'kxy tum wa̱'a̱ts midi yikjøø'kxp, ka' yikpøkpyety.
7.20 Yɨde'en ja wya̱a̱ñ:
―Ja' ja̱a̱'y yikpøkpyajtɨp midi pɨdsømp y'anmɨja̱'wɨnjotp.
7.21 Kumɨ jam pyɨdsimy ja ka'øwyɨnma̱a̱'ñ ku ja̱a̱'y kya'øwyɨnmay, jam pyɨdsimy ku ja̱a̱'y ñɨya̱a̱'y ñɨdø'øxy ñabyøjkxɨyɨdɨ, ku nadyu'uk ja̱a̱'y ñamyøøt'atyɨdɨ, ku ja̱a̱'y yikja̱a̱'y'øøky,
7.22 ku ja̱a̱'y myeech, ku ja̱a̱'y wenk ja̱a̱'y pyɨkta̱'a̱ky tsojkɨyɨ, ku ja̱a̱'y ti tka'ødyuñ, ku ja̱a̱'y tya̱a̱y'aty, ku ja̱a̱'y najts'a̱a̱w najtsjoojt yja̱a̱'y'aty, ku ja̱a̱'y myɨgu'uk ti ttamɨ'ama̱'a̱t'aty, ku ja̱a̱'y pyagajpxy, ku ja̱a̱'y ñamyɨkexyɨ, ku ja̱a̱'y nɨti tkawɨnmay.
7.23 Tum anmɨja̱'wɨnjotp yø ka'ødyunk jade'en chøøñ midi ja̱a̱'y tyikpøkpyajtp.

9.2-8
9.2 Tyudujkxøøwɨp ja Jesús wyɨnaty jade'en tø wya̱'a̱ñ, xjats ja pyabøjkpɨtøjk ja nɨdɨgøøk t'ukwa̱a̱y, ja Pedro ja y'ukwa̱a̱w møøt ja Jacobo jøts møøt ja Juan, jade'en ja ojts tmøøtnijkxy jam kojpkøjxp ma̱ ja Jesús adsu'jky tyɨga̱jch, jamts ja pyabøjkpɨtøjk wyɨnaty t'ukmøøtanɨ.
9.3 Yikxon wyet ja chama̱mbɨjky janch poop ejxɨm tsa̱p'øø'pkyɨn, nɨpøn ja̱a̱'y wyet ya̱ jade'en tkayikwa̱'a̱ch sa̱ dø'øn wyet ja pyoobɨyɨɨ'ñ.
9.4 Wɨnets ja pyabøjkpɨtøjk t'ejxpa̱ttøø ja Elías møøt ja Moisés, jøts ku ja tmøøtmadya̱'a̱ktɨ ja Jesús.
9.5 Xjats ja Pedro tnɨma̱a̱y ja Jesús:
―Wɨndsøn, ¡tyimy'øy'a̱jtp ku øø nya̱m'aty! Nyik'øyɨp øøts ujts'a̱a̱dyøjk, tu'uk mets mja', tu'uk Moisés yja', jøts Elías yja' tu'uk.

9.6 Tø ja pyabøjkpɨtøjk wyɨnaty yjanchø'øgɨdyøjkɨnɨdɨ, ka'ap ja y'ukwɨnma̱a̱'nbya̱tnɨdɨ sa̱ ja tnøjmɨdɨt ja Jesús paty ja Pedro jade'en nugo y'ukwa̱na̱a̱.
9.7 Wɨnets yoots myiiñ ma̱ ja jam wyɨnatyɨ, ja'ats ja ojts yik'adɨgøyɨdɨ, jøts jap yikmadøøy ja Dios y'ayuujk midi wa̱a̱n:
―Ya̱'a̱t n'U'nk øts ɨdø'øn njanchøjkpy, mɨmadojɨdɨ pønɨ sa̱ wya̱'a̱ñ.

9.8 Xjats ku ja jatyɨ y'ejxjø'ktøø, wɨnets ja nɨpøn tka'ejxpa̱ttøø ma̱ ja Jesús jam wyɨnaty, ja'ayɨ jam wyɨnaty nadyu'uk tanaapy.

12.28-31
Ja møj kutujk midi ja Dios ñɨ'ane'empy

12.28 Xjats wɨnet yja̱'jty tu'uk ja ka̱jpxwejpɨtøjk ja myɨgu'uk midi wyɨnaty tø tmadøy ku ja Jesús jam jade'en tmɨnagyajpxyɨ ja saduceotøjktɨ, jøts kumɨ ja wyɨnaty tnɨja̱wɨ ku ja Jesús wyɨnaty øy tø y'adsøy, wɨnets ja tyiktɨɨy, yɨde'en ja tnɨma̱a̱y:
―¿Midi'ibɨ ja Dios ja kyutujk jawaanɨ møj jøts nmɨmado'owɨnt?

12.29 Xjats ja Jesús y'adsøøy jøts ja wya̱a̱ñ:
―Ja' Dios jawaanɨ møj kyutujk'ajtpy midi wa̱mp yɨde'en: “Israelɨt ja̱a̱'y, ukmadowdɨ meets, tu'ugyɨ ja Dios pøn adøm ndios'a̱jtɨndɨp.
12.30 Jøts tsoktɨ ja jawaanɨ ejxɨm nɨti jade'en xkatsoktɨ, amumjoojt ja xwɨndsø'øgɨdɨt, ja' tu'ugyɨ mjotmay'a̱ttɨp, ja' tu'ugyɨ møk m'ajot'a̱ttɨp.” Ya̱'a̱t ɨdø'øn øgyutujk'a̱jtp.
12.31 Jøts jap jadu'uk midi ñɨñayjade'en møj, yɨde'en ja wya̱'a̱ñ: “Tsok mmɨgu'uktøjk, wɨndsø'øgɨ mmɨgu'uktøjk, jade'en xtsokt jøts jade'en xwɨndsø'øgɨt sa̱ kø'øm mnachøkyɨ, jøts sa̱ kø'øm mnawyɨndsø'øgɨyɨ.” Ka'ap jadu'uk kutujk te midi jawaanɨ møj sa̱ ya̱'a̱dɨndɨ.

14.10-11
Ku ja Judas ñay'awa̱jnɨyɨ jøts ja
tkøya̱kt ja Jesús

14.10 Wɨnets ja Judas Iscariote chøø'ñ pøn ja Jesús pyabøjkpɨtøjk wyɨnaty møøt ñɨmakmajtsk'aty, jøts ja ojts tnɨnijkxy ja teetywɨndsøn, ja'ats ja møøt tkajpxy'a̱jty jøts ku ja tkøya̱kt ja Jesús.
14.11 Xjats ku ja jade'en tmadoodøø, wɨnets ja jyanchxonda̱ktøø, jøts ja Judas ja meeñ jatyɨ yiktamɨ'awa̱'a̱nɨyɨɨ'ñ. Ja'agøjxpts ja Judas t'ɨxa̱a̱y ja ta̱a̱y ja wɨnma̱a̱'ñ juunɨ et ja t'ukøya̱kt ja wyɨndsøn.

14.44-46
14.44 Yɨde'en ɨdø'øn ja Judas wyɨnaty tø wya̱'a̱ñ jøts ja tu'uk tpɨkta̱'a̱kt ja ejxa̱'a̱nɨn midi ja y'ejxtɨp ku ja tkøya̱kt ja Jesús, yɨde'en ja wyɨnaty tø wya̱'a̱ñ:
―Pønɨ pøn øts ɨnet ndsu'kxpy, ja' ɨdø'øn ja wyɨnaty; ja'ats ɨdø'øn mma̱tstɨp, jøts ja xyiknøjkxtɨt ta̱'tspiky'ampy.

14.45 Xjats ku dø'øn ja jam jade'en yja̱'jty, wɨnets ja twɨnguwa̱'jkɨyɨɨ'ñ ja Jesús, yɨde'en ja tnɨma̱a̱y:
―Øts, wɨndsøn, memp.
Jøts ja ojts jade'en ttsu'kxy.
14.46 Xjats ja Jesús yiknɨxa̱jɨyɨɨ'ñ, jøts ja jade'en yikma̱jch.

15.6-15
Ku ja nwɨndsøn'a̱jtɨm Jesús
ñɨdujkɨyɨɨ'ñ
jøts ja y'ookt

15.6 Yɨde'en ɨdø'øn ja Pilato wyɨnaty ja kostumbrɨ tmøøt'aty ku ja pa̱skɨ xøøw tpa̱a̱ty, wɨnets ja tyik'awa̱'a̱tspɨdsimy nɨdu'ugɨn ja tsumyja̱a̱'y, pønɨ pøn ja mayja̱a̱'y yik'awa̱'a̱tspɨdsømwa̱ndɨp.
15.7 Jamts wyɨnaty tu'uk ja pøkyja̱a̱'y tsumy pøn txøøw'a̱jtp Barrabás, ja' ja jap møøt chum'ity pøn ja wyɨnaty møøt tø yikja̱a̱'y'øøky ku tsep ja wyɨnaty tø ttundɨ møøt ja kudunktøjk.
15.8 Xjats ja mayja̱a̱'y jam jade'en myendøø, jøts ja t'amɨdoobɨna̱xwa̱'a̱ktøø ja Pilato jøts tsumyja̱a̱'y ja tyik'awa̱'a̱tspɨdsø'ømt nɨdu'ugɨn sa̱ kyostumbrɨ ja wyɨnaty tmøøt'aty.
15.9 Wɨnets ja Pilato y'adsøøy jøts ja tnɨma̱a̱y:
―¿Sa̱ mee m'ukwa̱'a̱ñ, wan yø israelɨt wɨndsøn tyikmajtstu'uty?

15.10 Jade'en ja wya̱a̱ñ kumɨ tø dø'øn ja wyɨnaty tja̱'gyukɨ jøts ku ja teetywɨndsøn wyɨnaty nugo tø tkøya̱ktɨ ja Jesús tanejkɨngøjxp.
15.11 Xjats ja teetywɨndsøn tka̱jpxwejkøjxtøø ja mayja̱a̱'y. Ojts ja t'aga̱jpxɨdɨ, jøts ja wya̱'a̱ndɨt jøts wan ja Barrabás t'awa̱'a̱tspɨdsimy jøts ka'ap ja Jesús.
15.12 Xjats ja Pilato tyiktɨɨy ja mayja̱a̱'y, yɨde'en ja tnɨma̱a̱y:
―¿Jøtsɨmts yø israelɨt wɨndsøn, sa̱ yø yiktu'unt?

15.13 Wɨnets ja y'adsoodøø jøts ja wya̱ndøø møkta̱'a̱ky:
―¡Yikruspat!

15.14 Xjats ja Pilato tnɨma̱a̱y ja mayja̱a̱'y:
―¿Ti tundɨgøø'yɨn yø tø ttuñ, ti yø kyubatp?
Wɨnets ja tja̱a̱ktyimyikjɨna̱jxtøø, møk'ampy ja yja̱a̱ktyimwya̱ndøø:
―¡Yikruspat!

15.15 Jøts kumɨ yikjotkukɨwyampy ja Pilato wyɨnaty ja mayja̱a̱'y, xjats ja tyik'awa̱'a̱tspɨdsɨɨmy ja Barrabás; jøts ku ja t'ukna̱nkwyojpøø ja Jesús, wɨnet ja ojts tkøyaky jøts ja kyɨruspatt.

15.33-39 Ku ja nwɨndsøn'a̱jtɨm Jesús y'ø'jky

15.33 Xjats ku kyujkxøøw'a̱jty, wɨnets kyoodsɨyɨɨ'ñ ja na̱xwii'ñɨt, jaanɨm ojts yja̱jta̱'a̱ky møj wɨnakxyøøw.
15.34 Jøts ja Jesús møk'ampy wya̱a̱ñ:
―Eloi, Eloi, ¿lama sabactani? ―midi tyijpy: Dios Teety, Dios Teety, ¿jadits ku ø tø xna̱nktyuñɨ?

15.35 Wɨna̱a̱gɨn ja ja̱a̱'y jade'en tmadoodøø pøn jam wyɨnatyɨ jøts ja wya̱ndøø:
―Madowdɨ, ja Elías yø wya̱a̱dsøøpy.

15.36 Xjats tu'uk myiiñ janch pujtpɨm pøn tnɨxa̱jɨyɨɨ'ñ ja tanøxe'jts midi jade'en t'ejxp ejxɨm ja xa̱'a̱kjoptsɨn, ja'ats ja ojts tyikxøøky jap vino ta̱'a̱mjøtpy jøts ja tpɨkta̱a̱jky jam kipy jøp'a̱m, wɨnets ja jade'en tta'adejɨyɨɨ'ñ ja Jesús jøts ja ttukwɨmuukwa̱'a̱ñ, yɨde'en ja wya̱'a̱ñ:
―Majtstu'uttɨ; wan t'uk'ijxyɨm pønɨ janch'ukyikwɨna̱jkɨp ɨnet ɨdø'øn ja Elías jam kruskøjxp ku ɨnet ja mye'ent.

15.37 Wɨnets ja Jesús møk'ampy ya̱a̱jxy, jøtsnɨm ja y'ø'jky.
15.38 Jøts nay jatyɨ ja wet kujkwa'kxy y'akø'øtspa̱jky midi ja tsa̱ptøjk jam wyɨnaty y'awejtstuk'ajtpy, kuba̱jk'ampy ja kyø'øtstøjkɨyɨɨ'ñ jøts ja kyø'øtskɨda̱a̱jky ok'a̱m'ampy.
15.39 Jøts ku ja solda̱dɨ wɨndsøn jade'en ojts t'ixy pøn ja Jesús jam wyɨnaty twɨndanaapy, wɨnets ja wya̱a̱ñ ku ja Jesús wyɨnaty jade'en møk'ampy tø ya̱'a̱xy, jøts ku ja wyɨnaty tø y'øøky, yɨde'en ja wya̱a̱ñ:
―Janch tɨy tam ɨdø'øn Dios tam ya̱'a̱t y'ity y'U'nk.

15.42-46
Ku ja nwɨndsøn'a̱jtɨm Jesús ñe'kx
yikpɨkta̱a̱jky jap oo'kpɨ
tsa̱a̱ jutjøtpy

15.42 Xjats ku chuu'wɨyɨɨ'ñ ku ja poo'kxɨn xøøw wyɨnaty kyɨmjabom tpa̱a̱twa̱nɨ,
15.43 wɨnet ja José myiiñ, ja Arimate'ɨt ja̱a̱'y pøn wyɨnaty ja kutujk t'adsɨnaadyɨp. Ja'ats ɨdø'øn tjøp'ejxp jøts ja ttatøkɨwya̱'a̱ñ ja Dios kyutujk midi ja yja̱a̱'y ja tyanɨtanaapy, jøts ja ojts amumjoojt myiñ ma̱ dø'øn ja Pilato jam wyɨnaty, jøts ja t'amɨdoojɨ ja Jesús ñe'kx ku ja wyɨnaty tø y'øøky.
15.44 Xjats ja Pilato ñɨgyuma̱a̱p yja̱jty ku dø'øn ja wyɨnaty tø y'oo'knɨ, wɨnets ja tya̱a̱jxɨyɨɨ'ñ ja solda̱dɨ wɨndsøn jøts ja tyiktɨɨy pønɨ janch ku dø'øn ja wyɨnaty tø y'øøky.
15.45 Xjats ku ja solda̱dɨ wɨndsøn ja ojts tnɨgajpxy jøts ku ja janch jade'en, wɨnets ja Pilato tkøya̱jky ja oo'kpɨ jøts José ja yikmøøy.
15.46 Xjats ja tjuuy tu'uk ja poop wet midi øy midi majpxy, jøts ku ja tyikwɨna̱jky ja oo'kpɨ, ja'ats ja tya'amojts, jøts ja tpɨkta̱a̱jky jutjøtpy midi ja wyɨnaty tø tyikjuty jam tsa̱a̱jotp. Jøts ku dø'øn ja jade'en tpɨkta̱a̱jky, wɨnets ja møj tsa̱a̱ ja tta'agɨɨy.

16.1-7
Ku ja nwɨndsøn'a̱jtɨm Jesús
yjujkpyɨjky jadɨgojk
16.1 Xjats ku ja poo'kxɨn xøøw ña̱jxy, wɨnet ja María Magdalena t'atsjuudyøø ja pa̱'a̱kxuu'kpɨ møøt Jacobo tya̱a̱k, møøt ja Salomé, jade'en ja ojts t'atsjuudyɨ jøts Jesús ja t'atspɨkta̱'a̱kwa̱jnɨdɨ ku ja wyɨnaty tø y'oo'knɨ.
16.2 Xjats ja ojts ttanɨnøjkxtɨ jøpyɨ ku ja sama̱a̱n wyɨnaty tø y'abety, xøbɨdsimyu'nk ja yja̱'ttøø jam møj tsa̱a̱ agujkp ma̱ ja Jesús jam wyɨnaty tø yikpɨkta̱'a̱ky.
16.3 Yɨde'en ja kø'øm ñawya̱jnɨdøø:
―¿Pøn ɨnet ja tsa̱a̱ tjanch'agɨɨdyu'ut jøts ndøjkɨ'ɨnt?

16.4 Xjats ku ja yja̱'ttøø, wɨnets ja t'ejxtøø ku ja møj tsa̱a̱ ka'ap ja jap wyɨnaty ukteenɨ jap jut'agui'py, tø ja wyɨnaty yikɨɨyø'øñɨ.
16.5 Jøts ku ja tyøjkɨdøø jap mutsk tøjkjøtpy, wɨnets ja t'ejxpa̱ttøø tu'uk ja a̱nkɨlɨs midi ja wyɨnaty pya'ajpy tsɨnaapy, jøts midi wyɨnaty nayɨde'en ja poop wet myøøt'ajtpy. Xjats ku ja t'ejxpa̱ttøø wa̱a̱jtyøjk ja tijy, jøts ja ojts jantyimchø'jkɨdɨ.
16.6 Jøts ja a̱nkɨlɨs ja ojts ñɨɨ'mxyɨdɨ:
―Kidi mdsø'øgɨdɨ; nnɨja̱'wɨp øts ku meets ja Jesús ja ñe'kx x'ɨxa̱a̱jɨyɨdɨ. Tø ja jadɨgojk yjujkpyiky, øy xtyimy'ejxtɨt ma̱ ja yikpɨkta̱a̱jky.
16.7 Nøjkx ja pyabøjkpɨtøjk xukmadojɨdɨ møøt ja Pedro, jøts ñøjkxtɨt jam Galilea; jamts meets ja x'ejxtɨt jadɨgojk, jamts meets ja xmɨnabya̱a̱dɨyɨt jade'en sa̱ ja kø'øm mnɨma̱a̱jyɨdøø.

16.15-16
16.15 Yɨde'en ja yiknɨmaadyøø:
―Nɨyø'øyɨgyøxtɨ na̱xwii'ñɨt, jøts ja øgyajpxy jøts ja ømyadya̱'a̱ky xka̱jpxwa̱'kxtɨt ma̱ jaty ja ja̱a̱'y yjujky'a̱ttɨ.
16.16 Pønɨ pøn øts xjanchja̱'wɨp jøts pønɨ pøn nøbajtp, ja' nøjkx nɨtso'ok'a̱jtp ja y'anmɨja̱'wɨn; jøts pønɨ pøn øts xkajanchja̱'wɨp, ja' yiktagubatp ja pyøky.

16.19-20
Ku ja Jesús cha̱jpejty

16.19 Xjats ku ja pyabøjkpɨtøjk ja jade'en t'uknɨma̱a̱y, wɨnets ja cha̱jpejty, ojts Dios Teety ja tsa̱jpjøtpy yikpatøkɨyɨ, jøts ja tpuwa'jtsɨyɨɨ'ñ aga̱'ngyø'ampy.
16.20 Xjats ja pyabøjkpɨtøjk choo'ndøø, jøts ja ojts tka̱jpxwa̱'kxtɨ ja øgyajpxy ja ømyadya̱'a̱ky øy ma̱dsoo. Ja nwɨndsøn'a̱jtɨm Jesucristo ja kø'øm pudøjkɨyɨdɨp, jøts nay ja Jesús ja tmøøy ja myøk'a̱jtɨn jøts ja ttu'undɨt jade'en midi nɨpøn ja̱a̱'y ya̱ na̱xwiiñ kyajajtpy, paty ja mayja̱a̱'y ja tjanchja̱'wɨdɨ dø'øn ja pyabøjkpɨtøjk ja kyajpxy. Jade'en ɨdø'øn ja y'ejxɨ.